Psa 76 | HMO | STEP | Iuda dekenai noho taudia be Dirava idia diba. Dirava ena ladana be bada Israela dekenai.

Psalms 76

Israela ena Dirava ena ladana be bada

1 Iuda dekenai noho taudia be Dirava idia diba.
Dirava ena ladana be bada Israela dekenai.
2 Iena noho gabuna be Ierusalema dekenai.
Siona Ororo dekenai iena Ruma ia haginia vadaeni.
3 Unuseni ia ese ia dekenai idia tuari henia taudia,
edia peva bona diba ia hamakohia.
Edia kesi bona tuari kaia,
edia tuari gaudia ibounai danu,
be Dirava ese ia makohia.

4 Dirava e, oi be namo herea momokani.
Oiemu hairaina ese,
noho hanaihanai ororo edia hairaina ia hereaia noho.
5 Goada taudia ese edia tuari dekena amo idia abia kohu,
be haida ese idia abia,
bona unai goada taudia,
be mase ena mahuta ese ia abidia vadaeni.
Idia edia siahu be anina lasi, bona edia goada be ia ore vadaeni.
6 Iakobo ena Dirava e,
oi ese oi gwau henidia neganai,
hosi mai edia guia taudia danu idia mase ore.
7 To taunimanima ibounai ese oi idia gari henia noho.
Oi be oi badu momokani neganai,
daika ese oiemu vairana dekenai do ia gini diba?
8 Guba dekena amo oiemu kota hereva oi gwauraia,
vadaeni tanobada taudia be idia gari bada,
bona mai regena ta lasi oiemu vairana dekenai idia gini noho.
9 Unai neganai Dirava ia toreisi,
kota hereva do ia gwauraia totona,
bona tanobada dekenai idia hisihisi noho taudia ibounai,
be do ia hamauria totona.
10 Momokani taunimanima edia badu ese oi ia hanamoa noho,
bona oiemu badu ia ore murinai do mauri noho taudia ese,
oi do idia tomadiho henia.

11 Emui Dirava, Lohiabada, dekenai gwauhamata do umui henia,
bona gwauhamata ena anina do umui karaia.
Dirava umui hagegea noho taudia ibounai ese,
ia dekenai harihari gaudia do umui henia be namo,
badina ia dekenai taunimanima idia gari noho.
12 Dirava ese,
lohia taudia edia hekokoroku bona dagedage ia hadokoa noho,
bona tanobada ena king taudia ese,
Dirava dekenai idia gari henia noho.